မကြံစည်အပ်တဲ့အကြောင်း ၄ ပါးရှိပါတယ်။
၁။ ဘုရားအကြောင်း။
၂။ လောကအကြောင်း။
၃။ ဈာန်အကြောင်း။
၎။ ကံအကြောင်း။
ဘာလို့မစဉ်းစားအပ်တာလဲဆိုတော့ ကျမတို့ရဲ့ဖြုတ်ဥဏှောက်လိုအလွန်သေးငယ်တဲ့ဉာဏ်နဲ့ အလှမ်း မမှီ အောင်ဝေးကွာလှတဲ့အတွက် စဉ်းစားရင်းရူးသွားနိုင်လို့ပါ။ မမှီတဲ့ပန်းတုံးခုလှမ်းရင် လိမ့်ကျပြီး ကြိုးနိုင် ကန်းနိုင်သလိုပါပဲ။
ကံတွေက ပြုသူတွေ၊ခံရသူတွေ၊မေ့သွားပေမဲ့ သူက မမေ့ပါဘူး။ ခံရသူက ခွင့်လွှတ် ပေမဲ့လည်း သူက ခွင့်မလွှတ်ပါဘူး။ ခံရသူက အပြစ်မယူပေမဲ့လည်း သူက အပြစ်ပေးပါတယ်။ လူတွေလို ချစ်လို့ ခွင့်လွှတ် တာ၊ မုန်းလို့အပြစ်ပိုယူတာ၊ ကြောက်လို့အပြစ်ယူတာ၊ လိုချင်တာ ရှိလို့ ခွင့်လွှတ်တာစတဲ့ ဘက်လိုက်ခြင်း များ မရှိပဲ တိကျမှန်ကန်စွာအပြစ်ပေးပါတယ်။ ဒီလို တိကျ မှန်ကန်ပေမဲ့ လူတွေက မယုံကြည်ကြပါဘူး။ ဘာဖြစ်လို့လဲဆိုတော့ ကံရဲ့ အားနည်းချက်က အပြစ်ပေးနိုင်ဖို့ အတွက် အခြေအနေ အချိန်အခါ လိုအပ် ပါတယ်။ အခြေအနေ ပြည့်စုံမှသာ အကျိုးပေးနိုင် ပါတယ်။ များသောအားဖြင့် ဘ၀ပေါင်းများစွာခြားသွား နိုင်ပါ တယ်။ အကျိုးပေးတဲ့ အချိန်မှာ လုပ်ခဲ့တဲ့ သူက သူ့အပြစ်တွေကိုမေ့ကုန်ပြီ။
ကံနဲ့ ပတ်သက်တဲ့ အကြောင်းတွေကိုမြတ်ဘုရားရဲ့ သဗ္ဗညုတဉာဏ်တော်ကြီးနဲ့ရှင်းလင်း ဟော တော် မူခဲ့လို့ကျမတို့ ဗုဒ္ဓဘာသာ တွေသိခွင့်ရနေတာပါ။
မြတ်ဘုရားလက်ထက်က အမျိုးသမီးတစ်ဦးကြိုးဆွဲချနေတာကိုအမျိုးသားတစ်ဦးက လှမ်းမြင် လိုက်တယ်။ သူမြင်တဲ့အချိန်မှာ အမျိုးသမီးရဲ့ခြေထောက်ကမြေနဲ့ထိနေသေးတယ်။ သူ့ နောက်ကျော် မှာလည်းဓါးတစ်ချောင်းအသင့်ပါလာတယ်။ အမျိုးသားလည်း သူ့ဓါးကို လှမ်းယူပြီးအမျိုး သမီးရဲ့ လည်ပင်း က ကြိုးကိုခုတ်ဖြတ်ဖို့အပြေးသွားပါတယ်။ ဒါပေမဲ့ အနားရောက် တော့ ကြိုး မဟုတ်ပဲ မြွေကြီးဖြစ်နေတာနဲ့ ကြောက်အားလန့်အားနဲ့ထွက်ပြေးခဲ့ပါတယ်။ အံသြဖွယ် ကြိုးက မြွေဖြစ်သွားတယ်ဆိုတဲ့စကားပြန့်သွားပြီး၊ မြတ်ဘုရားအား လျောက်ထား တဲ့အခါ။ ကြိုးကမြွေဖြစ်သွားတာမဟုတ်ဘူး။ ကြိုးနဲ့သေရမဲ့ ကံပါလာတဲ့ အတွက်၊ အဲ့ဒီကံက ဖြက်ဖို့လာတဲ့သူကို တားတာကြောင့် ဓါးနဲ့ကြိုးကိုခုတ်ဖြတ်မဲ့သူရဲ့မျက်စိမှာ မြွေလို့မြင်တာဖြစ် ကြောင်း ရှင်းပြတော်မူခဲ့ပါ တယ်။
ဒီအတိုင်းပဲ ကျမတို့ အတော်များများ နာဘူးတဲ့ ရဟန္တာအရှင်မြတ်ရဲ့ဆွမ်းကို သွန်ပြစ်ခဲ့ တဲ့ ရဟန်း ဟာသူ့ရဲ့နောက်ဆုံးရဟန္တာဖြစ်ရမဲ့ဘ၀မှာတောင် ဘယ်လိုဆွမ်းခံထွက်ပေမဲ့ ဆွမ်းဝ အောင် ဖုန်း မပေးခဲ့ ရပါဘူး။ ဆွမ်းလောင်းတဲ့သူတွေရဲ့မျက်စိထဲမှာ သူ့သပိတ်က ဆွမ်းတွေ၊ ဟင်းတွေနဲ့ ပြည့်နေပြီး လောင်းထဲ့ စရာနေရာတောင်မတွေ့တဲ့အတွက်ဖြစ်ပါတယ်။ သူလုပ်ခဲ့တဲ့ ကံကအပြစ် ပေးနေတာပါ။
နောက်ရဟန်းတစ်ပါးဆိုရင်လည်း နတ်သားဘ၀က ရဟန်းနှစ်ပါးအမြင်မှားအောင်၊ ရဟန်းတစ်ပါး အပေါ့သွားရာကပြန်အလာမှာ အမျိုးသမီးနဲ့အထင်မှားအောင်လုပ်ခဲ့တဲ့အတွက် သူရဟန္တာဖြစ်တဲ့ အချိန်မှာ တောင် အများမျက်စိမှာသူ့နောက်ကအမျိုးသမီးတစ်ယောက်က ကောက်ကောက်ပါအောင်လိုက် နေခဲ့ပါ တယ်။
ဒီလိုမျိုးအကြောင်းတွေက ရေးမပြနိုင်လောက်အောင်အလွန်များပါတယ်။ ကျမတို့ယခု လက်ရှိ ဘ၀မှာလည်း ကြည့်တတ်ရင် မြင်နိုင်တဲ့ ကံတရားရဲ့အပြစ်ပေးမှုတွေကို မြင်နေ တွေ့နေရပါတယ်။ ဥပမာ။ အိမ်ထဲမှာကိုယ့်ဘာသာနေနေတဲ့သူကို ကားကလာတိုက်လို့သေသွားတာ။ လေယာဉ်ပျက်ကျပြီး လေယာဉ် ပေါ်ပါတဲ့သူကမသေပဲ အိမ်ထဲကလူကသေတာ။
ကျမတို့ လက်တွေ့စမ်းသပ်တဲ့ ဓါတ်ခွဲခန်းတွေမှာလည်း ဥပမာ မြွေဆိပ်ရဲ့ အစွမ်း သတ္တိ တွေ စမ်းသပ်တဲ့အခါ ကြွက်တွေကိုအုပ်စုအမျိုးမျိုးခွဲထားပါတယ်။ မြွေဆိပ်အချိန်အဆ အနည်း ကနေ အများ အထိ ဥပမာ ၁၊၂၊ ၃၊ ၄၊ ၅ ဂရမ် အထိုးခံရမဲ့ ကြွက်အုပ်စုတွေအပြင်၊ (Control အုပ်စု) ဒီအုပ်စုကတော့ မြွေဆိပ်မပါပဲ မြွေဆိပ်မှာပါဝင်တဲ့ ဆားရည်သန့်ကိုသာ အထိုးခံရ မဲ့ အုပ်စုပါ။ ဒီအုပ်စုမှာပါတဲ့ကြွက်တွေက အစမ်းသပ်ခံရပေမဲ့ မသေပါဘူး။ မြွေဆိပ် အများကြီး အထိုးခံရတဲ့ကြွက်တွေ ကတော့သေကြရပါတယ်။ ဒါပေမဲ့ မြွေဆိပ်နဲ့ မသေမဲ့ကြွက်က ကြံဖန်ပြီး လွှတ်သွားတတ်ပါတယ်။ တခါတရံ ဆေးထိုးသူက ဆေး ပုလင်း မှားယူမိတာမျိုး၊ ကြွက် မကိုင်တတ် လို့ကြွက် လွတ်ထွက်သွားတာမျိုး၊ ကြွက်ထောင်ခြောက်မှား တာမျိုး စတာ တွေဖြစ် တတ်ပါတယ်။ အကြောင်းတိုက်ဆိုင်လို့ ကျမဆေးကျောင်းသူဘ၀က အဖြစ်ဆန်း လေး ၂ခု ကို လည်း ပြောပြချင်ပါတယ်။
ပထမ အကြောင်းကတော့ လူတစ်ဦးကအလွန်သေချင်တဲ့အတွက် ကန်တော်ကြီး စောင်းကို နံနက်စောစောလူပြတ်တဲ့အချိန်သွားပါတယ်။ အဲ့ဒီတုန်းက ကန်တော်ကြီးစောင်းမှာ ဘာအကာရံမှ မရှိ သေးပါဘူး။ ကမ်းစပ်မှာပေါက်နေတဲ့သစ်ပင်တစ်ပင်ရဲ့ ရေထဲကိုထိုးထွက် နေတဲ့ အကိုင်းကနေ ကြိုးဆွဲချဖို့စီစဉ်ပါတယ်။ အလွန်သေချင်နေတဲ့အတွက်ကြောင့်အကြောင်း အမျိုးမျိုးကြောင့်ကြိုးဆွဲချတာ မအောင်မြင် မှာစိုးတဲ့အတွက် ကြိုးဆွဲမချခင်မှာ အဆိပ်လည်း သောက်လိုက်ပါတယ်။ ကြိုးဆွဲချရင်းနဲ့လည်း၊သေနတ်နဲ့သူ့နှားထင်ကိုပစ်ပါတယ်။ သုံးမျိုးနဲ့ သတ်တာမို့ မသေစရာအကြောင်းမရှိနိုင်ဘူးလို့လဲသူမှတ်ယူ ထားပါ တယ်။ ဒါပေမဲ့ သူမသေပဲ ဆေးရုံရောက်လာပါတယ်။ ဘာလို့မသေတာလဲ။
သေချင်လို့ သေကြောင်းကြံကြပေမဲ့ တကယ်သေရမှာကိုတော့ လူတွေအလွန်ကြောက် ကြပါတယ်။ ဒါကြောင့် သေနတ်ပစ်ကျွမ်းကျင်သူမဟုတ်တဲ့ သူဟာ ကြောက်ကြောက်နဲ့ပစ်လိုက် တဲ့အတွက် သေနတ် ကျည်ဆံက နှားထင်ကိုမထိပဲချည်ထားတဲ့ကြိုးကိုသွားမှန်ပါတယ်။ ကျည်ဆံ ကြောင့်ကြိုးပြတ်ပြီး ရေထဲကို ကျသွားပါတယ်။ ရေထဲကိုအရှိန်နဲ့ကျတဲ့အတွက် ကြောင့်ရယ် ကန်ရေရဲ့အေးမြတဲ့အထိအတွေ့ကြောင့် သူ မျိုထားတဲအဆိပ်တွေ အံထွက်သွားပါတယ်။ သေနတ်သံနဲ့ ရေထဲကျတဲ့အသံကြောင့် နံနက်ထပြေး တဲ့ သူများကြားပြီးလာကယ်ကြတာပါ။
နောက်တစ်ဦးကတော့ ပုဇွန်တောင်ချောင်းနားမှာနေတဲသူပါ။ သူကတော့ ရှေးမြန်မာ မင်းများ လက်ထက်ကတံကျင်လျှိုအသတ်ခံရသလို သစ်သားချောင်းကြီး စအိုကနေ တံကျင် လျှိုသလိုအလျှိုခံရလို့သေဆုံးပြီးရန်ကုန်ဆေးရုံကြီးရင်ခွဲရုံကိုရောက်လာတာပါ။ ယခုလို ခေတ်မှီတဲ့ အခါမှာကြံကြံဖန်ဖန် အသေဆိုးနဲ့ သေရတာကတော့ သူကနံနက်တိုင်း ပုဇွန်တောင် ချောင်းတံတားမှာထိုင်ပြီး မဆင်ယိုလေ့ရှိ တယ်တဲ့ တစ်နေ့မနက်မှာ မဆင်ယိုနေရင်း တံတား ပေါ်ကပြုတ်ကျပြီး တံတားနားမှာ ငုတ်တိုကျန်နေတဲ့ လှေချီတဲ့တိုင်ချောင်းပေါ်ကျတာတဲ့။
ပြီးခဲ့တဲ့နှစ်ကတောင်ပြင်သစ်နိုင်ငံမှာ လိင်တူချစ်သူ အမျိုးသားနှစ်ယောက် အရှင် လတ်လတ် မြေမြုပ် အသတ်ခံခဲ့ရပါတယ်။ အဲ့ဒီမြို့က ဘာသာတရားယုံကြည်တဲ့သူတွေက လိင်တူဆက်ဆံတာကို ဘာသာတရားကလက်မခံလို့သတ်ပြစ်ခဲ့တာပါ။
ဒီအကြောင်းတွေမြင်နေ၊သိနေ၊ကြားနေရတာ အလွန်မှကြောက်စရာ၊သံဝေဂ ရစရာပါ။
လုပ်တုန်းကပြုံးပြုံးကြီးလုပ်ခဲ့ကြပြီး၊ခံရမဲ့အလှည့်မှာပြုံးနိုင်ကြပါ့မလားဆိုတာစဉ်းစားကြစေလိုပါတယ်။
ကျမ်းကိုး။
ကြာနီကန်ဆရာတော်၏တရားတော်များ။
No comments:
Post a Comment